Davlat qabul komissiyasi tasdiqlagan imitiyozlar

Huquqiy asosi: Vazirlar Mahkamasining “Fuqarolarning o‘zini o‘zi boshqarish organlari uchun kadrlar tayyorlash tizimini takomillashtirish chora-tadbirlari to‘g‘risida” 2021-yil 8-yanvardagi 3-son qarori. Qo‘llanishi: Fuqarolarning o‘zini o‘zi boshqarish organlari xodimlari pedagogika, moliya-iqtisod sohalari hamda oliy ta’lim muassasalarining “5520100 – Ijtimoiy ish (faoliyatning turli sohalari bo‘yicha)” bakalavriat ta’lim yo‘nalishiga sirtqi ta’lim shaklida o‘qishga qabul qilinadi. Ular uchun ajratilgan qo‘shimcha qabul ko‘rsatkichlari Prezident qarori bilan belgilanadi va oliy ta’lim muassasalariga davlat buyurtmasi asosida qabul qilinadi. Mazkur imtiyoz asosida qabul qilingan talabalarga stipendiya to‘lanmaydi, o‘qish to‘lov-kontrakt asosida amalga oshiriladi.

Huquqiy asosi: O‘zbekiston Respublikasi Prezidentining “O‘zbekiston Respublikasi Qurolli Kuchlari safida muddatli harbiy xizmatni o‘tab bo‘lgan fuqarolarga imtiyozlar tizimini takomillashtirish to‘g‘risida” 2012-yil 31-maydagi PQ-1765-son qarori. Vazirlar Mahkamasining 2019-yil 17-avgustdagi 681-son qarori. Qo‘llanishi: O‘zbekiston Respublikasi Qurolli Kuchlari safida muddatli harbiy xizmatni o‘tab, harbiy qism qo‘mondonligining tavsiyanomasiga ega bo‘lgan fuqarolar oliy ta’lim muassasalariga qo‘shimcha qabul ko‘rsatkichlari doirasida o‘qishga qabul qilinadi. Mazkur abituriyentlar uchun ajratilgan alohida qabul ko‘rsatkichlari doirasida, tanlagan birinchi oliy ta’lim muassasasi bo‘yicha tanlovda ishtirok etadi.

Huquqiy asosi: O‘zbekiston Respublikasi Prezidentining “Xotin-qizlarni qo‘llab-quvvatlash, ularning jamiyat hayotidagi faol ishtirokini ta’minlash tizimini yanada takomillashtirish to‘g‘risida” 2021-yil 5-martdagi PQ-5020-son qarori. Vazirlar Mahkamasining 2020-yil 23-iyundagi 402-son qarori. Qo‘llanishi: Oila va xotin-qizlar davlat qo‘mitasi tomonidan berilgan tavsiyanomaga ega ehtiyojmand oilalardagi xotin-qizlar oliy ta’lim muassasalariga qo‘shimcha kvotalar doirasida tanlovda ishtirok etadi. Ular uchun hududlar kesimida kvotalar ajratiladi va kvota doirasida eng yuqori ball to‘plagan abituriyentlar o‘zlari tanlagan birinchi oliy ta’lim muassasasiga talabalikka tavsiya etiladi.